Lútur á grænni flösku

EYRARPÚKINN - 35

Þeir voru að storka hvor öðrum bræðurnir og þreif Nonni brennivínsflösku á búrbekk, hellti í sig í hugsunarleysi og rak upp skaðræðisöskur.

Mamma kom hlaupandi úr eldhúsinu en pabbi bölsótaðist í skúrnum.

Hafði Nonni skaðbrennt kokið og lá á búrgólfinu með hljóðum.

Vítissódi á pytlunni og okkur bannað að drekka úr slíkum flöskum án vitneskju um innihaldið.

Mesta mildi hversu snöggur Nonni var að skyrpa uppúr sér lútnum og skolaði nú munninn og kældi við svelginn í þvotthúsinu.

Jóhann Árelíuz er rithöfundur og skáld.

• Lútur á grænni flösku er kafli úr Eyrarpúkanum, gáskafullu skáldverki sem gerist á Eyrinni á Akureyri um miðja síðustu öld. Bókin kom út 2003.