Beitarkóngur á Borgum

 

Fjármennska var Einari Jónssyni ær og kýr enda áhuginn óseðjandi um vöxt sauðkindarinnar og viðgang.

 

Eitt ár vann pabbi fyrir bleikum hesti hjá Benedikti á Egilsstöðum og reið hann fáknum norður í Sleitustaði í Hólahreppi og tók alla tíð mið af búskaparháttum Sigurðar á Sleitustöðum en landið í Skagafirði liggur betur til beitar en Borgir í Vopnafirði þar sem allt fór á kaf í austanáttinni.

 

Á Borgum byrjaði pabbi með síldarmjölsgjöf fyrstur vopnfirskra bænda og gafst vel, enda mældi hann mjölið milli þumals og vísifingurs og vissi upp á gramm hvað hver kind þoldi sér til viðurværis auk töðu og beitar og færði á blað, því pabbi kunni persónu kinda sinna þó hann kynni ekki nöfn þeirra allra eins og elsti sonurinn og ekkert fór í súginn hjá honum.

 

Einar áformaði að virkjun fossa í Sunnudalsá þegar vistin uppi á Borgum misbauð heilsu hans enda oft nær orðinn úti þegar hann hleypti fénu út í kolsvarta myrkri og stóð yfir því inni í giljum í öllum veðrum.

 

Þá var timbrað þakið á Borgum snjóþungt en pabbi hafði ekki bolmagn til moksturs og hefði karl faðir átt skilið jörð á borð við Syðri-Vik eða Eyvindarstaði til að yrkja á fjárvísindi sín.

 

Jóhann Árelíuz er rithöfundur og skáld.