Pistlar

Kreppuáll, fuglalíf og ástarglóð

Jóhann Árelíuz skrifar 05. júlí 2026 | kl. 06:00

EYRARPÚKINN - 91

Metúsalem á Bustarfelli sagðist ætla að sprengja bombu, forystumaður íhaldsins Árni G. Eyland hefði birst á hlaðinu hjá sér og vildi alla bændur feiga.

Bakkfirðingar ortu

Árni ætlar að byggja brýrnar
og brúa tímans kreppuál,
en okkur vantar kálfa í kýrnar
og kjósum því gamla Pál.

Betri er einn fugl í hendi en tveir í skógi og hrifust fjármenn í Skeggjastaðaprestakalli lítt af borgarbúanum Árna sem kvað

Bankar hækka, hallir rísa,

hér og þar er gulli stráð.

Þar munu allir eiga vísa

uppskeru í lengd og bráð.

Á öðrum fundi hrópar Andólfur Þú ert ekkert nema kerlingin en Bótólfur var kvæntur konu af betra fólki.

Segir þú sem sérð bara til annarrar handar og ekki getur getið konu þinni barn svaraði Bótólfur.

Ebba í Miðhúsum og Steindóri Hraunfellingi fannst þetta þref lítilmótlegt enda ágætlega náttúraðir og orti Ebbi

Morgnarnir á Miðhúsum

í minningunni geymast.

Fuglalíf við fjöruna

og fjöllin aldrei gleymast.

Ekki stóð á Steindóri

Fram á sundi öndin óð

er að þóknast steggnum.

Ennþá lifir ástarglóð

undir Miðhúsveggnum.

Jóhann Árelíuz er rithöfundur og skáld.

Á sunnudögum um langa hríð birti akureyri.net kafla úr Eyrarpúkanum, gáskafullu skáldverki Jóhanns Árelíuzar sem gerist á Eyrinni á Akureyri um miðja síðustu öld. Bókin kom út 2003. Kreppuáll, fuglalíf og ástarglóð er kafli úr bókinni Sveskjur í sólarlaginu, síðari bók Jóhanns um Eyrarpúkann en þar segir einkum frá dvöl drengsins á æskuslóðum föður hans í Vopnafirði. Bókin kom út 2010.

Til baka í yfirlit pistla