Bílnum stolið

EYRARPÚKINN - 27

Ég náði ekki upp fyrir stýrið þegar ég tók fólksvagn Þormóðs traustataki. Nældi ég í lyklana úr jakkavasa bróður og tíkall um leið því Nonni hafði litlar gætur á eftir böll.

Ók ég fyrir hornið á Eyrarvegi og horfði út Ægisgötu. Á því horni var pollur í rigningum og gaman að beita þeim bláa útí stöðuvatnið.

Það var sumarið sextíuogtvö og Roy Orbison í útvarpinu.

Svo færði ég mig niðrá túnið norðan Lönguvitleysunnar þurr í munni.

Pabbi mátti ekki af þessu vita og þagði Simmi þunnu hljóði enda fjórum árum eldri og kræfur við akstur.

Bláminn lét vel að stjórn, bara rek'ann í fyrsta gírinn og áfram.

Jóhann Árelíuz er rithöfundur og skáld.

• Bílnum stolið er kafli úr Eyrarpúkanum, gáskafullu skáldverki sem gerist á Eyrinni á Akureyri um miðja síðustu öld. Bókin kom út 2003.