Torfunefið lengist hægt og bítandi

Framkvæmdir við endurnýjum og stækkun Torfunefsbryggju ganga vel og gert er ráð fyrir að hægt verði að nota mannvirkið í sumar; þótt verkinu verði fjarri því lokið verður aðstaðan orðin góð til bráðabirgða. Hvalaskoðunarbátar geta þá notað bryggjuna á ný og lítil skemmtiferðaskip jafnvel lagst þar að.

Bryggjan var ónýt, eins og Akureyri.net greindi frá fyrir margt löngu. Ákveðið var að nota tækifærið og gera ekki bara við hana heldur stækka verulega og farið var í samkeppni vegna fyrirhugaðrar uppbyggingar á svæðinu austan Glerárgötu og sunnan við menningarhúsið Hof.