Fjórir nýliðar á þing úr NA-kjördæmi

Fjórir nýliðar setjast á Alþingi úr Norðausturkjördæmi eftir kosningarnar í gær. Þeir eru Ingibjörg Ólöf Isaksen, nýr oddviti Framsóknarflokksins, og fyrsti þingmaður kjördæmisins, Berglind Ósk Guðmundsdóttir, Sjálfstæðisflokki, Jakob Frímann Magnússon, Flokki fólksins og Jódís Skúladóttir, VG, sem er uppbótarþingmaður. 

Þórarinn Ingi Pétursson, þriðji maður Framsóknar, er í fyrsta skipti kjörinn á Alþingi en hann kom oft inn sem varamaður á nýliðinu þingi og sat sem alþingismaður um tíma eftir að Þórunn heitin Egilsdóttir fór í veikindaleyfi. Þá sat Jakob Frímann sem varaþingmaður fyrir Samfylkinguna stuttan tíma fyrir hálfum öðrum áratug.