Bjarkey verður í öðru sæti á lista VG

Bjarkey Olsen Gunnarsdóttir, alþingismaður og þingflokksformaður VG, sem lenti í öðru sæti í forvali flokksins um helgina, hefur ákveðið að taka sæti á listanum. Hún var í vafa í gær, strax eftir að úrslit lágu fyrir.

„Ég neita því ekki að niðurstaða forvalsins var sannarlega óvænt. Um leið og ég þakka öllum þeim sem studdu mig til forystu vil ég tilkynna að ég hyggst taka annað sætið á listanum. Ég óska Óla Halldórssyni til hamingju með fyrsta sætið og öllum hinum sem hlutu kosningu og hlakka til að vinna með þeim og öllum okkar góðu félögum í Norðausturkjördæmi,“ segir Bjarkey í færslu á Facebook síðu sinni.

„Fram undan eru mikilvægar kosningar og ég mun leggja allan minn kraft í að Vinstri græn hljóti góða kosningu. Við getum óhrædd lagt okkar góðu verk fyrir kjósendur í haust. Áfram VG!“

Frétt um niðurstöðu forvalsins

Viðbrögð Bjarkeyjar