Pistlar

Sveitasæla

Jóhann Árelíuz skrifar 14. september 2025 | kl. 06:00

EYRARPÚKINN - 56

Eftirmiðdagur á sveitasetri inn af Dalvík í hvítri júnísól.

Okkur er boðið uppá kaffi og með því í stofu sem ber þess merki að þar er ekki gengið um dagsdaglega og ekkert rýfur þögnina nema kellingaspjallið sem færist í aukana.

Iðar allt af spikfeitum flugum á rúðum og í gluggakistum og er þrálátt suð þeirra værðar- og syfjulegt í ljóma vorsumardagsins en akkúrat þegar húsfreyja ber á borð bústna könnu með rjóma röðulrauðum lendir feitasta flugan magalendingu í þykkan löginn.

Þríf ég fluguna umsvifalaust uppúr könnunni og lýst bylmingshöggi þar sem hún liggur afvelta á borðinu og spýtist innvolsið rjóma blandið um allan dúk.

Fer hrollur um hjálpræðiskonurnar en góður rómur er þó gerður að karlmannlegri framgöngu minni þó ég þyki harðhentur og flugan blessuð í bak og fyrir.

Þá skín sól á Svarfaðardal en sunnan stofugluggans sitrar lækjarpísl fram sílgrænan teig krökkan sóleyjum norður og niður túnið.

Jóhann Árelíuz er rithöfundur og skáld.