Líneik og Ingibjörg stefna á efsta sætið

Tvær konur bjóða sig fram í efsta sæti á lista Framsóknarflokksins í Norðausturkjördæmi fyrir Alþingiskosningarnar í haust: Líneik Anna Sævarsdóttir, alþingismaður flokksins, og Ingibjörg Ólöf Isaksen, bæjarfulltrúi á Akureyri og framkvæmdastjóri Læknastofa Akureyrar.

Líneik Anna sat á Alþingi frá 2013 til 2016 og aftur frá 2017. Hún var í öðru sæti á lista Framsóknarflokksins við síðustu kosningar. Líneik hefur ekki tilkynnt formlega um framboð en Akureyri.net veit að hún gerir það innan tíðar. Ekki er vitað hvort fleiri hyggjast blanda sér í baráttuna um leiðtogasætið.

Þórunn Egilsdóttir er oddviti flokksins í kjördæminu, en hefur dregið sig í hlé vegna veikinda og verður ekki í framboði í haust af þeim sökum, eins og greint var frá á Akureyri.net í morgun.

Framsóknarmenn kjósa um efstu sæti á listanum í póstkosningu sem stendur yfir frá 1. mars til 31. mars. Framboðsfrestur rennur út sunnudaginn 14. febrúar.