Grátt í fjöllum og áfram norðan óveður

Í nótt gránaði í fjöll, örlítil slydda var á Akureyri í bítið og norðanátt er stíf. Norðan óveður verður áfram á landinu í dag, skv. upplýsingum frá Veðurstofu Íslands. Síðan er útlit fyrir talsverða úrkomu á Norðurlandi þar til seint á morgun.

Appelsínugul veðurviðvörun er í gildi til kl. 13.00 í dag. Spáin fyrir Norðurland eystra á þeim tíma er svohljóðandi: Norðan 13-20 metrar á sekúndu og snjókoma eða slydda með lélegu skyggni og versnandi akstursskilyrðum. Varasamar aðstæður fyrir ökutæki vanbúin til vetraraksturs og ekki ráðlegt að leggja í ferðalög til fjalla.

Gul veðurviðvörun tekur gildi kl. 13.00 í dag og gildir fram yfir hádegi á morgun. Spáin fyrir þann tíma hljóðar svo: Talsverð eða mikil rigning. Búast má við auknu afrennsli og vatnavöxtum sem eykur hættu á flóðum og skriðuföllum. Fólk er hvatt til þess að sýna aðgát.

• Frétt Akureyri.net í gærkvöldi: Óvissustigi lýst yfir vegna norðanáhlaups