Sæfari lengur í slipp en áætlað var

Viðgerðir og viðhald á Grímseyjarferjunni Sæfara reyndust tímafrekari en ætlað var. Samkvæmt nýjustu upplýsingum er áætlað að ferjan hefji siglingar á ný í síðasta lagi 9. mars. Greint er frá þessu á vef Akureyrarbæjar í dag.

„Eins og áður hefur komið fram fór Sæfari í slipp 19. janúar í reglubundið viðhald og viðgerðir. Við framgang endurbótanna reyndust viðgerðir tímafrekari en talið var í fyrstu og því hefur dvöl ferjunnar í slipp lengst,“ segir í tilkynningu bæjarins.

„Á meðan Sæfari er frá siglingum verða engar farþegasiglingar milli Dalvíkur og Grímseyjar. Farþegar eru beðnir um að nýta flugferðir á meðan. Flogið er samkvæmt áætlun þrisvar í viku; á þriðjudögum, föstudögum og sunnudögum“. Fram kemur að farmur verði fluttur með Þorleifi EA-088, sömu daga og ferjan hefði annars siglt.