Fyrstu kríurnar eru komnar til Grímseyjar

Fyrstu kríurnar sumarsins hafa nú vitjað varpstöðvanna í Grímsey. „Alfreð Garðarsson sem búsettur er í Grímsey varð var við fyrstu kríurnar í vikunni. Varpið í eyjunni er eitt af stærri kríubyggðum á landinu og er talið að þar verpi þúsundir para,“ segir á Grímseyjarhluta vefs Akureyrarbæjar um helgina.

Krían er einstakur farfugl og er líf hennar eitt samfellt sumar, segir í fréttinni. „Til að gera það leggur hún á sig lengsta farflug allra fugla. Kríurnar koma til Grímseyjar jafnan í byrjun maí og halda á brott aftur í byrjun ágúst. Þær fljúga krókaleiðir yfir heimshöfin og eru komnar í Weddellhafið við Suðurskautslandið í nóvember, þar sem þær dvelja yfir suðrænu sumarmánuðina fram í apríl áður en ferðin norður hefst á ný.“

Rannsóknir á merktum kríum hafa sýnt að árlegt farflug þeirra getur verið yfir 80–90 þúsund kílómetrar, sem samsvarar um tveimur hringferðum umhverfis jörðina. Krían getur orðið yfir 30 ára gömul og á lífsferli sínum getur hún því flogið vegalengd sem jafngildir allt að sjöfaldri fjarlægðinni til tunglsins.