Lundinn er mættur í Grímsey

Í fyrradag sást til fyrstu lundanna í Grímsey þetta vorið og í gær voru þeir mættir í eyjuna.

Eftir því sem fram kemur í frétt á grimsey.is sást til lunda skammt fyrir undan ströndina á miðvikudaginn og í gær tóku systurnar Unnur og Halla Ingólfsdætur eftir þeim í björgunum suður við vitann.

Óvenjusnjóþungt hefur verið í Grímsey síðustu vikur og meðal annars þurfti nýlega að fresta kvenfélagsfundi vegna illviðris og ófærðar. Hins vegar hefur mikið tekið upp af snjó í hlýindunum síðustu daga þannig að lundarnir ættu að geta ratað á holurnar sínar og farið að gera klárt fyrir sumarið.