Ferjan Sæfari siglir loks á ný á morgun

Grímseyjarferjan Sæfari hefur loksins áætlunarsiglingar á ný á morgun, mánudaginn 30. mars, eftir umtalsverðar viðgerðir og umbætur. Þetta kemur á síðu eyjarinnar á vef Akureyrarbæjar.

„Þau sem stefna á að heimsækja Grímsey um páskana geta því hvort heldur sem er tekið ferju eða flug. Áætlunarferðir með ferjunni eru á mánudögum, miðvikudögum og föstudögum og með flugi á þriðjudögum, föstudögum og sunnudögum. Yfir páskana fækkar áætlunarferðum eitthvað, sjá nánar á vef Vegagerðarinnar og Norlandair,“ segir í tilkynningunni.

„Í Grímsey eru þrír gististaðir, veitingastaður, búð og sundlaug. Skemmtilegasti tími ársins er fram undan með ríkulegu fuglalífi og björtum sumarnóttum. Sjófuglarnir eru farnir að setjast upp í björgin og það styttist óðum í að fyrstu lundarnir láti sjá sig en þeir fara yfirleitt að láta á sér kræla í kringum 10. apríl.“

Sæfari fór í slipp 19. janúar í reglubundið viðhald og viðgerðir. Upphaflega var gert ráð fyrir að ferjan yrði til þjónustu reiðubúin á ný að tiltölulega skömmum tíma liðnum en verkið reyndist mun tímafrekara en upphaflega var gert ráð fyrir.