Búið að bólusetja eyjarskeggja í Grímsey

Sextán Grímseyingar voru bólusettir fyrir Covid-19 í dag með bóluefni frá Jansen og þurfa því ekki fleiri bólusetningar að sinni. Þetta kemur fram á vef Akureyrarbæjar.

Nokkrir starfsmenn Heilbrigðisstofnunar Norðurlands flugu í morgun frá Akureyri út í Grímsey og bólusettu þá eyjarskeggja sem ekki höfðu verið sprautaðir, auk þess að sinna reglubundinni læknisheimsókn. Alls eru um 40 manns í Grímsey um þessar mundir, að því er segir á vef bæjarins, en margir höfðu þegar fengið bólusetningu í landi.

„Það munar miklu fyrir íbúa að fá þessa þjónustu út í eyju því það er bæði kostnaðarsamt og tímafrekt að ferðast til Akureyrar til að fá sprautuna,“ segir á vef Akureyrarkaupstaðar.