Ferjan er í slipp – aukaflug á þorrablót

Árlegt þorrablót Grímseyinga er á dagskránni í kvöld. Þar sem Grímseyjarferjan Sæfari er í slipp hefur verið gripið til þess ráðs að bjóða upp á aukaflug til Grímseyjar í dag. Frá þessu er sagt á Facebook-síðu Akureyrarbæjar.

 

Grímseyingar eru ekkert að láta hjátrú um ólukku þegar föstudagur og 13. dagur mánaðarins fara saman. Í kvöld verður nefnilega einn af hápunktum skemmtanalífsins í Grímsey á hverju ári, þorrablótið, hefðbundið trogþorrablót þar sem hver gestur eða fjölskylda kemur með sínar eigin kræsingar á blótið. Mikið er lagt upp úr skreytingum og skemmtiatriðum, hljómsveit úr landi til að spila fyrir dansi fram eftir nóttu. Þar sem ferjusiglingar liggja niðri er boðið upp á aukaflug til Grímseyjar í dag og aftur til baka á sunnudag.