Stúdentar HA: Hætt verði við sameiningu

Stúdentar við Háskólann á Akureyri (HA) vilja að fallið verði frá áformum um sameiningu skólans og Háskólans á Bifröst. Þetta kemur fram í ályktun sem samþykkt var af öllum aðildarfélögum Stúdentafélags Háskólans á Akureyri (SHA).

Ályktunin sem kynnt var í dag er svohljóðandi:

Stúdentafélag Háskólans á Akureyri ályktar, af þeim gögnum sem liggja fyrir og því umfangsmikla samtali sem átt hefur sér stað meðal félagsfólks, að Háskólinn á Akureyri og Háskólinn á Bifröst séu sterkari í sitt hvoru lagi og að möguleg sameining sé ekki til þess fallin að styrkja háskólana tvo. Þeir hópar stúdenta sem háskólarnir þjónusta, áherslur náms og kennslufyrirkomulag eru að svo miklu leiti frábrugðin að stúdentaráð Háskólans á Akureyri telur hagsmunum beggja skóla betur borgið, verði fallið frá áformum um sameiningu þeirra. Stúdentafélag Háskólans á Akureyri leggst einróma gegn sameiningu Háskólans á Akureyri og Háskólans á Bifröst.

Fyrir hönd Stúdentafélags Háskólans á Akureyri

Stúdentaráð HA

Magister, félag kennaranema

Eir, félag heilbrigðisvísindanema

Data, félag tæknifræði- og tölvunarfræðinema

Kumpáni, félag félagsvísindanema- og sálfræðinema

Stafnbúi, félag auðlindanema

Reki, félag viðskiptanema

Þemis, félag laganema