FÉSTA, VMA, SAk og 100 hjúkrunarrými

Skipulagsmálin snúast auðvitað ekki eingöngu um uppbyggingu íbúðarhverfa og skipulagningu þeirra, eða þéttingu byggðar. Nokkrar stórar opinberar framkvæmdir eru á döfinni á Akureyri, stúdentagarðar, viðbygging við Sjúkrahúsið og Verkmenntaskólann og bygging nýs hjúkrunarheimilis við Þursaholt.

• Á ÞRIÐJUDAG – HÚSIN SPRETTA UPP Í HOLTA- OG MÓAHVERFUM
• Í FYRRADAG – FRAMBOÐ LÓÐA FYRIR UM 260 ÍBÚÐIR Á ÁRI
• Í GÆR – ÞÉTTING BYGGÐAR – HAGKVÆM EN UMDEILD
• Í DAG – FFÉSTA, VMA, SAK OG 100 HJÚKRUNARRÝMI

Við Norðurslóð eru í undirbúningi framkvæmdir við stúdentagarða og búið að samþykkja byggingaráform fyrir 125-150 íbúðareiningar. Framkvæmdir við viðbyggingu Sjúkrahússins á Akureyri eru í undirbúningi og stefnt að því að þær hefjist vorið 2026. Nánar um þau áform í annarri umfjöllun. Hjúkrunarheimili mun rísa við Þursaholt í Holtahverfi norðan/austan Krossanesbrautar. Þar er gert ráð fyrir 100 rýmum með möguleika á stækkun og fjölgun um 40 rými síðar. Fyrir liggur breyting á deiliskipulagi fyrir viðbyggingu Verkmenntaskólans og unnið að undirbúningi verksins hjá Framkvæmdasýslu – Ríkiseignum. Stefnt er að útboði 2026 eða 2027, en nákvæm tímasetning liggur ekki fyrir.

Norðurslóð 3-7 – Gert er ráð fyrir að framkvæmdir hefjist vorið 2026 við 124 íbúðareiningar ásamt skrifstofurými fyrir FÉSTA, Félagsstofnun stúdenta á Akureyri. Byggingarreitirnir liggja meðfram Dalsbrautinni, milli Norðurslóðar og Borgarbrautar, með innkeyrslu úr Norðurslóð. Nordic Office of Architecture hlaut fyrstu verðlaun í hönnunarsamkeppni fyrir nýja stúdentagarða. Stúdentagarðarnir samanstanda af þremur fjölbýlishúsum, einu með 64 herbergjum og tveimur íbúðum og tveimur húsum með 30 íbúðum í hvoru.

Eyrarlandsholt – Gert er ráð fyrir að uppbygging hefjist við nýja rúmlega 10 þúsund fermetra legudeild vorið 2026. Framkvæmdin er í yfirferð hjá byggingafulltrúa.

Þursaholt 6-10-12-14-16-18 – Stefnt er að því að útboð á byggingu 100 rýma hjúkrunarheimili verði auglýst í lok árs. Mikil breyting hefur verið gerð á skipulagi við Þursaholt frá því að fyrst var farið af stað í Holtahverfi norður. Um tíma voru uppi áform um svokallaðan lífsgæðakjarna, en hætt hefur verið við hann á þessum stað og stefnt á aðra staðsetningu. Nú er í ferli breyting á skipulagi til að heimila fjölgun rýma um 40 sem hægt yrði að byggja síðar. Fyrsti hlutinn, 100 rými, yrði á lóðum 6-12, en viðbótin á lóðum 14-18 á norðausturhluta svæðisins. Gera má ráð fyrir að hönnun og framkvæmd taki um þrjú og hálft ár.

Hringteigur 2 – Unnið er að undirbúningi viðbyggingar við Verkmenntaskólann á Akureyri. Í maí 2024 voru undirritaðir samningar milli mennta- og barnamálaráðherra annars vegar og bæjar- og sveitarstjóra við Eyjafjörð um stækkun húsnæðis VMA. Í bígerð er 1.500 fermetra bygging á norðurplani skólans þar sem fram mun fara nám í húsasmíði og bifvélavirkjun. 

Hlíðarfjallsvegur - Þá er einnig vert að geta uppbyggingar gagnavers atNorth við Hlíðarfjallsveg þó þar sé ekki um opinbera framkvæmd að ræða, en þar tók deiliskipulag gildi í júlí 2022. Uppbygging þriðja áfanga gagnaversins er nú komin á fullt og liggur nú þegar fyrir ósk um frekari stækkun. Akureyrarbær og atNorth hafa samið um nýtingu glatvarma sem fallið getur til við starfsemi gagnaversins.