Fyrsti doktorinn frá HA í hjúkrunarfræði

Nýlega varði Dr. Elín Arnardóttir doktorsritgerð sína í hjúkrunarfræði við Háskólann á Akureyri en Elín er fyrst til þess að ljúka doktorsnámi í hjúkrunarfræði síðan háskólinn fékk til þess heimild árið 2017. 

Verkefni Elínar ber heitið „Tíðni forstigseinkenna sykursýki af tegund 2 og notkun fyrirbyggjandi nálgana í heilsugæslu.“ Ritgerðin var unnin undir leiðsögn dr. Árúnar K. Sigurðardóttur, prófessors við hjúkrunarfræðideild Háskólans á Akureyri. Auk hennar voru í doktorsnefnd dr. Marit Graue, prófessor við HVL rannsóknarháskólann í Bergen í Noregi, dr. Timothy Skinner, prófessor við Kaupmannahafnarháskóla og miðstöðina fyrir atferlisrannsóknir á sykursýki í Melbourne í Ástralíu, og dr. Beate-Christin Hope Kolltveit, dósent við HVL rannsóknarháskólann í Bergen í Noregi.

Á heimasíðu Háskólans á Akureyri segir Hafdís Skúladóttir, forseti hjúkrunardeildar eftirfarandi: „Uppbygging doktorsnáms við háskólann hefur verið mikil og við erum stolt af því að geta boðið upp á doktorsnám á níu fræðasviðum. Mig langar að óska Elínu Arnardóttur til hamingju með að vera orðin doktor í hjúkrunarfræði og óska henni velfarnaðar í hennar störfum.“