Línumaðurinn Petrov á heimleið frá Þórsurum

Línumaðurinn Kostadin Petrov, sem hefur leikið gríðarlega vel með Þórsliðinu í handbolta í vetur, er á förum heim til Norður-Makedóníu af persónulegum ástæðum, að því er frem kemur á heimasíðu Þórs í dag.

Kokí, eins og hann er kallaður, lék með landsliði þjóðar sinnar á heimsmeistaramótinu sem enn stendur yfir í Svíþjóð og Póllandi.

„Fyrr í dag samþykkti handknattleiksdeild Þórs félagsskipti Kokí Petrov til HC Alkaloid í heimalandi sínu Norður-Makedoníu,“ segir í tilkynningu sem birtist á heimasíðu Þórs síðdegis.

„Kokí, eða Kostadin Petrov eins og hann heitir fullu nafni, var búinn að vera algjörlega frábær fyrir Þór í vetur og einnig er hann frábær persónuleiki. Kokí kveður lið Þórs vegna persónulegra ástæðna, en langveikur fjölskyldumeðlimur þarfnast nærveru hans meira en við í Þór akkúrat núna, við eigum þó eftir að koma til með sakna hans.“

Á Þórsvefnum segir: „Koki bað um góðar kveðjur til allra í Þór og kvaddi með orðunum: „You are my family!“ Handknattleiksdeild Þórs óskar Kokí velfarnaðar í framtíðinni.“

Króatíska skyttan Josip Vekic er einnig á förum frá Þór eins og Akureyri.net greindi frá í gær. Þór rifti samningi við leikmanninn sem ekki þótti standa undir væntingum.

„Það er ljóst að stórt skarð er hoggið í leikmannahópinn en fyrsti leikur liðsins í Grill 66 deildinni verður gegn toppliði HK eftir viku eða föstudaginn 3. febrúar kl. 19:30,“ segir á heimasíðu Þórs í dag.