Skötuveisla Þórsara á Þorláksmessu

Meistaraflokkur Þórs í knattspyrnu hefur auglýst skötuveislu í félagsheimilinu Hamri frá kl. 11:30 til 14:30 á Þorláksmessu, 23. desember. Um er að ræða eina af fjáröflunum liðsins. 

Í boði verða bæði skata og saltfiskur í aðalrétt, ásamt ýmsu meðlæti, rófum, rauðum íslenskum kartöflum, hamsatólg, rúgbrauði og smjöri. Kaffi og konfekt verða í eftirrétt. Veislan kostar 6.500 krónur og drykkur fylgir með, að því er segir í tilkynningu.

Fiskinn í veislunni fá Þórsarar hjá FISK Kompaní en svo skemmtilega vill til að einn leikmanna Þórsliðsins, Ragnar Óli Ragnarsson, er sonur eigenda fyrirtækisins, Ragnars Haukssonar og Ólafar Ástu Salmannsdóttur.

• Hægt er að smella á myndina hér að neðan til að skrá sig í veisluna