Jákvætt tekið í ósk um fljótandi sánu

Skipulagsráð Akureyrar tekur jákvætt í ósk frá MeiSauna ApS, þar sem óskað var eftir að fá úthlutað plássi við bryggju á Akureyri fyrir fljótandi sánu. Skipulagsfulltrúa var falið á fundi ráðsins að kanna mögulegar staðsetningar, í samráði við Hafnasamlag Norðurlands og umhverfis- og mannvirkjasvið.

Það var Meinhard Egilsson Olsen sem sendi inn erindið en hann er einn þriggja ungra frumkvöðla frá Færeyjum sem komu á fót fyrstu fljótandi sánunni þar í landi árið 2024. Hugmyndir þeirra ganga út á að koma fyrir 1-2 fljótandi sánuklefum við bryggju á Akureyri og gera langtímasamning við bæjarfélagið. Fyrsti kostur þeirra er að sánan verði staðsett við Hof en smábátahöfnin í Sandgerðisbót er nefnd til vara.

Gert er ráð fyrir að hægt verði að bóka tíma í klefana frá 6 að morgni fram á kvöld og að bókunarferlið verði sjálfvirkt. Viðskiptavinir fá sendan talnakóða til að komast inn í klefana og geti nýtt aðstöðuna í 90 mínútur. Í umsókninni er bent á að starfsemin hafi engin varanleg áhrif á umhverfi sitt. Klefarnir eru fljótandi, þannig að ekki þurfi að byggja nein mannvirki. Hvor klefi rúmar 10 manns.

Í gögnum þeirra kemur fram að gestir Saunadypp, eins og þeir kalla starfsemina, hafi verið yfir 8.000 talsins í færeyska bænum Runavik á árinu 2025 og nýtingin hafi verið 85% yfir sumarmánuðina. Runavik er 4.000 manna bæjarfélag og áætlanir þeirra gera ráð fyrir að gestafjöldinn í fljótandi sánuklefana á Akureyri verði yfir 20.000. Auk þess að kaupa aðgang í stakt skipti verði einnig boðið upp á áskriftarkort til lengri tíma.