Hvers vegna að tileinka sér gervigreind?

Gervigreind er til umfjöllunar í nýjum þætti hlaðvarpsins Forysta og samskipti sem kominn er í loftið. Umsjónarmaður er sem fyrr Sigurður Ragnarsson forseti Viðskiptadeildar Háskólans á Akureyri (HA) og stjórnenda- og forystuþjálfari og gestir hans að þessu sinni dr. Auðbjörg Björnsdóttir, forstöðumaður kennslu- og upplýsingatæknimiðstöðvar HA, og Magnús Smári Smárason, verkefnastjóri gervigreindar við HA, einn fremsti sérfræðingur landsins á þessu sviði. Magnús Smári er lesendum Akureyri.net að góðu kunnur fyrir pistla um gervigreind.

 

Í þættinum er farið út um víðan völl gervigreindar en sjónum sérstaklega beint að notkun hennar og hvernig hún getur nýst stjórnendum og forystufólki. 

 

 

Komið er inná þætti er varða mannleg samskipti, tilfinningagreind, siðferði og hvernig gervigreind getur hjálpað við að taka betri ákvarðanir. Einnig er innleiðing gervigreindar rædd og hvernig hún getur gagnast að bæta samskipti á vinnustöðum. Komið er inná allskonar pælingar, eins og stafræna föstu, hreinskilni gervigreindar, sem og hver framtíðarþróunin verður.