Heimila þriggja hæða byggingar við Miðholt

Akureyrarbær hefur auglýst fyrirhugaða breytingu á Aðalskipulagi Akureyrar 2018-2030 með breytingu á leyfilegri hæð húsa á lóðunum nr. 1, 3, 5, 7 og 9 við Miðholt. Breytingin felst í því að heimila þriggja hæða byggingar auk kjallara í stað tveggja hæða eins og gert er ráð fyrir í núgildandi skipulagi. Um er að ræða svæðið norðaustan verslunar Bónus við Langholt.

Um svæðið Norðan Hörgárbrautar segir í núgildandi skipulagi: „Smágerð íbúðarbyggð frá árunum 1950-1980 fyrir utan svæði syðst sem liggur að Undirhlíð en þar eru tvö 5 og 7 hæða fjölbýli sem byggð voru á árunum 2011-2017. Hverfið er að mestu fullbyggt en uppbygging heimil á óbyggðum svæðum við Miðholt og Stafholt. Þar geta hús verið einbýli, raðhús eða lítil fjölbýli að hámarki tvær hæðir til samræmis við yfirbragð aðliggjandi byggðar. Fjöldi íbúða geta verið um 40 talsins, allt eftir útfærslu og íbúðartegund.“

Frestur til að senda inn ábendingar er til 17. júlí.