Bjóða fleiri en Bjarkey og Óli sig fram í 1. sæti?

Framboðsfrestur Vinstri hreyfingarinnar – græns framboðs í Norðausturkjördæmi, vegna Alþingiskosninganna í haust, rennur út á miðnætti í kvöld. Steingrímur J. Sigfússon, stofnandi VG og oddviti í kjördæminu, dregur sig nú í hlé eftir 37 ára þingsetu og tveir hafa tilkynnt að þeir sækist eftir oddvitasætinu.

• Bjarkey Olsen Gunnarsdóttir, alþingismaður, sem var í öðru sæti á lista VG fyrir fjórum árum stefnir á að skipa fyrsta sæti listans.
• Óli Halldórsson, sveitarstjórnarmaður í Norðurþingi, hefur einnig tilkynnt að hann sækist eftir fyrsta sætinu.
• Jódís Skúladóttir, sem situr í sveitarstjórn Múlaþings, hins nýja sveitarfélags á Austurlandi, stefnir á annað sæti framboðslistans.
• Kári Gautason, framkvæmdastjóri þingflokks VG, hefur lýst því yfir að hann vilji „ofarlega á listanum.“

Fyrir miðnætti kemur í ljós hvort fleiri gefi kost á sér í efstu sæti listans. Kjörfundur Vinstri grænna verður rafrænn dagana 13. til 15. febrúar.