550 brautskrást frá Háskólanum á Akureyri

Tæplega 550 kandídatar brautskrást frá Háskólanum á Akureyri (HA) á Háskólahátíð sem hófst í gær og lýkur í dag. Það er stærsti útskriftarárgangur skólans frá upphafi.

Í gær voru brautskráðir kandídatar í framhaldsnámi en fyrir hádegi í dag kandídatar af heilbrigðis-, viðskipta- og raunvísindasviði og eftir hádegi af hug- og félagsvísindasviði.

Háskólahátíð er alltaf tímamót í lífi kandídata, aðstandenda þeirra og starfsfólks háskólans, eins og það er orðað á vef HA. Þá markar hátíðin í ár einnig sérstök tímamót fyrir Eyjólf Guðmundsson, rektor skólans. Hann brautskráir kandídata í tíunda og síðasta skipti í ár.

„Það hafa verið alger forréttindi að fá að stýra Háskólanum á Akureyri síðastliðin tíu ár og svo sannarlega verið ferðalag þar sem reynt hefur á en líka unnist stórkostlegir sigrar og við, háskólasamfélagið í HA, höfum komist í gegnum allskonar erfiðleika en ávallt höfum við komist í gegnum þá sterkari en áður,“ segir Eyjólfur á heimasíðu skólans.