Hversu vel hreyfist þú? Getur verið að þig vanti hreyfanleika?

HEILSA – 15

Hreyfanleiki (mobility) er getan til þess að hreyfa líkamann með stjórn og stöðugleika í gegnum sitt eðlilega hreyfisvið. Hann er grunnur að því hvernig við hreyfum okkur, hvort sem það er í daglegu lífi, vinnu eða íþróttum.

Hreyfanleika og liðleika er oft ruglað saman. Á einfaldastan hátt má segja að liðleiki (e.flexibility) sé hversu mikið vöðvarnir þínir geta teygst en hreyfanleiki (mobility) er hversu vel þú getur stjórnað hreyfingu.

Þú gætir verið liðug þegar þú teygir þig í kyrrstöðu. En hreyfanleikinn kemur í ljós þegar þú þarft að snúa þér, beygja þig og lyfta í sömu hreyfingu, til dæmis þegar þú þarft að lyfta einhverju upp af gólfinu? Það er þar sem hreyfanleiki skiptir máli.

Liðleiki segir til um hvort þú kemst í stöðu. Hreyfanleiki segir til um hvort þú getur stjórnað henni.

Hversu vel hreyfist þú í raun og veru í daglegu lífi? Í einföldum hreyfingum eins og að beygja þig niður, klæða þig í sokka, setjast í bíl eða ná í eitthvað upp í skáp.

Flest okkar hugsa lítið um þetta þar til líkaminn er allt í einu orðinn stirðari og hreyfingar óþægilegri og krefjast meiri fyrirhafnar en áður. Margir finna fyrir verkjum eða stirðleika með aldrinum og tengja það einfaldlega við að eldast. Aldur getur vissulega haft áhrif, en hann er sjaldnast eina skýringin. Oft liggur ástæðan í því hvernig við höfum hreyft okkur yfir tíma og hversu fjölbreytt sú hreyfing hefur verið. Kyrrseta og einhæf hreyfing spila stórt hlutverk, líkaminn verður einfaldlega góður í því sem hann gerir mest af.

Líkaminn er frábær í því að aðlagast og því venjumst við þessum einkennum smám saman og förum jafnvel að telja þau eðlilegan hluta af því að eldast. Þegar hreyfanleiki minnkar byrjum ómeðvitað að redda okkur í gegnum hreyfingar sem við framkvæmum. Með tímanum getur það aukið álag á ákveðin svæði og leitt til verkja og óþæginda.

Það góða er að við höfum áhrif og getum haft mikið um eigin líðan og hreyfigetu að segja. Hreyfanleika er hægt að bæta á öllum aldri með markvissri og fjölbreyttri hreyfingu. Það þýðir ekki endilega meira heldur einfaldlega að við hreyfum okkur betur. Ef þú finnur að líkaminn er orðinn stirðari en áður, eða að einfaldar hreyfingar eru farnar að krefjast meiri fyrirhafnar, er það ekki endilega eitthvað sem þú þarft að sætta þig við.

Í Sjálfsrækt heilsumiðstöð er einmitt lögð áhersla á að vinna með hreyfanleika á markvissan og uppbyggilegan hátt, þar sem þú færð betri skilning á eigin líkama og hvernig þú getur hreyft þig á þann hátt sem styður við þig til lengri tíma.

Það er frábært skref að gefa sér tækifæri til að finna hvernig manni getur liðið í líkamanum þegar hann fær að hreyfast betur.

Guðrún Arngrímsdóttir er ÍAK einkaþjálfari, jógakennari og markþjálfi með diplómu í jákvæðri sálfræði ásamt því að vera önnur eigenda Sjálfsræktar heilsumiðstöðvar. Pistlar hennar og Hrafnhildar Reykjalín Vigfúsdóttur birtast annan hvern þriðjudag á  akureyri.net.