Afleitt veður í viku í Grímsey og ekkert róið

Veðrið hefur verið afar vont í Grímsey síðustu vikuna eða svo. Sjómenn tóku upp netin fyrir viku enda stefndi í að ekki yrði hægt að vitja þeirra á næstunni og því hætta á að bæði net og afli skemmdust. Frá þessu segir í frétt á vef Akureyrarbæjar.

Þrátt fyrir vont veður og mikla snjókomu hafa samgöngur að mestu gengið greiðlega. Ferjan fór tvær ferðir í síðustu viku og flogið var út í eyju síðustu tvo sunnudaga. Um 20 manns eru nú í eynni, þessu nyrsta hverfi Akureyrarbæjar; nokkrir íbúar tóku sér svokallað brælufrí og fóru í land þar sem ljóst var að ekki yrði hægt að sækja sjó á meðan veðrið gengi yfir.