Toppslagur Þórs og Hauka í Bónusdeildinni

Það er skammt stórra högga á milli hjá kvennaliði Þórs í körfuknattleik. Í kvöld mætast tvö efstu lið Bónusdeildarinnar þegar Þór tekur á móti Haukum. Fólki er eflaust í fersku minni þegar liðin mættust í átta liða úrslitum VÍS-bikarsins á laugardaginn þar sem Þórsstelpurnar gerðu sér lítið fyrir og tryggðu sér sæti í undanúrslitum bikarkeppninnar.

Leikur liðanna í bikarkeppninni á laugardaginn var hin besta skemmtun þar sem Þórsliðið hafði náð góðri forystu, en Haukar náðu að hleypa spennu í leikinn undir lokin og náðu næstum að jafna, en þó ekki. 

Fyrir leikinn í kvöld eru Haukar í efsta sæti Bónusdeildarinnar, hafa unnið 12 leiki af 14, en Þór í 2. sæti með tíu sigra í 14 leikjum. Fjórar umferðir eru eftir af hefðbundnu deildarkeppninni áður en deildinni verður tvískipt í efri og neðri. Haukar unnu fyrri leik liðanna í deildinni í nóvember með níu stiga mun.

• Bónusdeild kvenna í körfuknattleik
  Íþróttahöllin á Akureyri kl. 19:15
  Þór - Haukar