Skíðamót Íslands, íshokkí og Þór-KA

Skíðamót Íslands í alpagreinum hefst í Hlíðarfjalli fyrir hádegi í dag. Úrslitaleikur A-deildar karla í Kjarnafæðimótinu í knattspyrnu er á dagskrá í kvöld og eins og oftast áður eru það Þór og KA sem mætast í úrslitum. Leikið verður í Boganum og hefst leikurinn kl. 18:00. Frestaður þriðji leikur í úrslitaeinvígi Toppdeildar kvenna í íshokkí er einnig kominn á dagskrá í dag, hefst kl. 16:45 í Skautahöllinni á Akureyri

Skíðamót Íslands í alpagreinum

Mótið hefst fyrir hádegi í dag í Hlíðarfjalli og stendur til sunnudags.

• Svig er á dagskránni í dag, keppni hefst kl. 10:00 og fyrsti keppandi í seinni ferð rennir sér af stað kl. 11:45.

Keppt verður í stórsvigi á morgun, laugardag, og samhliðasvigi á sunnudag.

Spennan magnast í íshokkíeinvíginu

Þriðji leikur í úrslitakeppni Toppdeildar kvenna í íshokkí er á dagskrá í Skautahöllinni á Akureyri í dag, en honum var frestað um einn dag vegna óveðursins sem gekk yfir landið í gær. Staðan í einvíginu er 1-1 og því ljóst að viðureignin fer að minnsta kosti í fjóra leiki.

SA vann fyrsta leikinn á Akureyri 1-0, en SR svaraði með 2-1 sigri í öðrum leik eftir framlengingu og vítakeppni.

• Toppdeild kvenna í íshokkí
  Úrslit, leikur 3
  Skautahöllin á Akureyri kl. 16:45
  SA - SR
• Útsending: icehockeyiceland.tv
  Áskrift að rás eða stökum leikjum

Úrslitaleikur Kjarnafæðimótsins til styrktar Kvennaathvarfinu

• Kjarnafæðimótið í knattspyrnu, A-deild karla
  Úrslitaleikur
  Boginn kl. 18
  Þór - KA

Knattspyrnudómarafélag Norðurlands stendur fyrir Kjarnafæðimótinu ár hvert. Að venju verður selt inn á úrslitaleikinn og mun ágóðinn renna til Kvennaathvarfsins á Akureyri að þessu sinni.