Þegar áhuginn vex hraðar en aðstaðan

Ég skrifa þessa grein sem foreldri iðkenda í íshokkí á Akureyri og sem stjórnarmaður í Íshokkísambandi Íslands. Ástæðan er einföld: við erum komin á þann stað að aðstaðan er farin að kalla á næstu skref í uppbyggingu.

Í dag eru 440 iðkendur í íshokkí hjá Skautafélag Akureyrar samkvæmt skráningu til ÍSÍ, auk um 70 iðkenda í listhlaupi og starfsemi í krullu og skautahlaupi. Þetta þýðir að vel á fimmta hundrað barna, ungmenna og fullorðinna reiða sig á eina aðstöðu sem hefur ekki vaxið í takt við starfsemina.

Á sama tíma hefur afreksstarfið verið mjög öflugt. Á síðustu árum hafa um 70% landsliðsfólks Íslands í íshokkí, í öllum aldursflokkum, komið úr röðum félagsins. Það segir meira en mörg orð um gæði starfsins – en líka hversu mikið er verið að gera þrátt fyrir aðstæður sem eru töluvert frá því sem best gerist.

Það er þó mikilvægt að halda því til haga að á síðustu árum hefur verið stigið mikilvægt skref í uppbyggingu aðstöðunnar. Ný félagsaðstaða, tækjasalur og upphitunarsalur voru tekin í notkun fyrir um tveimur árum og hafa skipt miklu máli fyrir starfsemi félagsins. Fyrir það er þakklæti til staðar. En sú uppbygging var aðeins fyrsti áfangi – og nú blasir við að halda þarf áfram á sömu braut.

Ísinn í skautahöllinni er nýttur nánast samfellt frá morgni til kvölds. Það sýnir skýrt hversu mikil eftirspurn er eftir aðstöðunni. Um leið þýðir það að lítið svigrúm er til að bæta við tímum eða þróa starfsemina frekar án þess að endurskoða aðstöðuna.

Við leikjaálag, þegar meistaraflokkur spilar og yngri flokkar eru á sama tíma, duga fjórir liðaklefar ekki alltaf til að mæta þörfinni. Yngri flokkar eru kynja blandaðir og þurfa aðskilda aðstöðu, sem kallar á fleiri og betur skipulögð rými til framtíðar.

Íshokkídeildin hefur jafnframt, með öflugu starfi foreldrafélags og sjálfboðaliða, komið upp þurrkaðstöðu fyrir búnað barna og ungmenna. Sú aðstaða hefur nýst vel miðað við aðstæður, en ljóst er að til lengri tíma væri æskilegt að slík aðstaða yrði hluti af innviðum hallarinnar.

Þetta undirstrikar vel hversu mikið starfið hefur vaxið og að þörf er á að þróa aðstöðuna áfram í takt við þann vöxt.

Samhliða þessu fara tækifæri forgörðum. Erfitt er að halda alþjóðleg íshokkímót vegna skorts á klefum án sérstakrar undanþágu frá alþjóða Íshokkísambandinu og listhlaup hefur ekki raunhæfa aðstöðu til að halda alþjóðleg mót þar sem upphitunarsvell er almenn krafa á slíkum mótum. Við erum því ekki aðeins að glíma við takmarkanir í aðstöðu heldur líka að missa af tækifærum sem gætu skilað bæði samfélagslegum og efnahagslegum ávinningi.

Samhliða þessu má einnig sjá tækifæri til frekari þróunar. Opnir almenningstímar hafa verið mjög vel sóttir á síðustu árum. Eftirspurnin er til staðar og með auknu svigrúmi væri hægt að auka slíka þjónustu enn frekar.

Einnig hafa komið fram áhugasamir aðilar um að halda alþjóðleg „old boys“ mót á Akureyri, sem gætu haft jákvæð áhrif bæði fyrir íþróttalífið og samfélagið í heild. Þá er til staðar áhugi frá vinnustöðum og félagasamtökum á að nýta skautahöllina til afþreyingar og hópefla. Með aukinni aðstöðu gæti slíkt orðið raunhæfur valkostur sem hluti af starfseminni.

Það er mikilvægt að horfa á heildarmyndina. Þetta er ekki vandamál sem leysist með einni aðgerð. Það þarf bæði að bæta búningsaðstöðu og skapa meira svigrúm á ísnum sjálfum. Klefar og stoðrými leysa flæðið og aðstöðuna í daglegu starfi, en viðbótarsvell er forsenda þess að hægt sé að vaxa, dreifa álagi og styðja við áframhaldandi afreksstarf.

Á Akureyri hefur byggst upp öflugt og metnaðarfullt starf í íþróttum á ís. Nú er tækifæri til að halda áfram þeirri vegferð í góðu samstarfi við bæjaryfirvöld og tryggja að aðstaðan þróist í takt við þann veruleika sem við sjáum í dag.

Kristján H. Kristjánsson er foreldri iðkenda í íshokkí á Akureyri og stjórnarmaður í Íshokkísambandi Íslands