Óleyfisframkvæmd og niðurrif í Lundargötu?

Byggingarfulltrúi hefur sent erindi til eiganda Lundargötu 4 þar sem krafist er stöðvunar á framkvæmdum. Erindi þess efnis var kynnt á fundi skipulagsráðs bæjarins í gær.

Akureyri.net hefur áður fjallað um uppbyggingu í Lundargötunni og víðar á Eyrinni þar sem Gunnar Árnason hefur keypt og gert upp gömul hús í Eiðsvallagötu, Gránufélagsgötu og Lundargötu, meðal annars hús númer 4b, 6 og 6b í Lundargötunni. Í fyrri umfjöllun kom fram að Lundargata 4 hafi brunnið í janúar 1965. Húsið var aldrei endurbyggt heldur var gert plan þar til að auðvelda aðgengi að Lundargötu 4b og 6b. Á þeim tíma var töluverður rekstur í bakhúsunum og aðgengið batnaði mikið eftir að planið kom.

• Reitur við Lundargötu hefur tekið stakkaskiptum | akureyri.net

Arnór Bliki Hallmundsson hefur í húsapistlum á bloggsíðu sinni fjallað um húsin í Lundargötunni, en þó ekki bakhúsin 4b og 6b sérstaklega.

• Hús við Lundargötu - arnorbl.blog.is

Í erindi byggingarfulltrúa sem lagt var fram til kynningar í skipulagsráði í gær kemur fram að bygging sem reist var árið 1914 hafi verið rifin án tilskilinna leyfa, auk þess sem verið sé að reisa byggingar á lóðinni án byggingarleyfis og í ósamræmi við gildandi deiliskipulag. Þá virðist sem hluti framkvæmda sé utan þeirrar lóðar sem lóðarleigusamningur framkvæmdanna nái til, að því er fram kemur í bókun ráðsins.