Hugmyndir SS Byggis um hús við Tónatröð

SS Byggir hefur kynnt skipulagsyfirvöldum bæjarins hugmyndir að uppbyggingu við Tónatröð í Innbænum, næstu götu neðan við sjúkrahúsið. Fyrirtækið hefur áhuga á að reisa þar fimm fjölbýlishús.

Tónatröð gengur suður úr Spítalavegi. Þar eru nokkrar auðar lóðir sem byggingaverktakinn sótti um í lok síðasta árs með þeim fyrirvara að fram næðist breyting á deiliskipulagi. Fimm hús standa við götuna, þar af tvö vestanmegin, sem bæði víkja ef hugmyndir SS verða að veruleika. Ein af forsendum verkefnisins er einmitt sú að samningar náist við eigendur húsanna tveggja vestan götunnar, svo að fyrirhugaðar byggingar myndi samstæða heild.

Hugmyndin er að byggja húsin – glæsileg útsýnishús, eins og verktakinn kallar þau – upp í brekkuna og að þau nái upp fyrir brekkubrún. Útsýnið yrði stórbrotið, sérstaklega til austurs og yfir Pollinn, en einnig til norðurs og suðurs. SS Byggir segir byggingarlandið sem um ræðir ekki nýtast íbúum Akureyrar í dag. Þar sé hvorki skipulagður gróður né ræktun og halli landsins henti illa til útivisvar.

Forráðamenn SS Byggis segja lagt upp með að byggja vistvæn hús og þróa verkefnið með umhverfisvottun í huga. Hvert hús myndi tengjast göngu- og hjólastíg austan sjúkrahússins, með brú frá stiga- og lyftuhúsi.

Bílageymsla er hugsuð undir hvert hús þannig að hægt sé að lágmarka sjáanleg bílastæði utanhúss. Tengingin við göngu- og hjólastíg vestan húsanna, og stórar og vel útbúnar geymslur fyrir reiðhjól og rafmagnshjól, ættu að stuðla að minni bifreiðanotkun íbúa Tónatraðar, að mati forráðamanna SS Byggis, enda stutt í fjölmenna vinnustaði – sjúkrahúsið, framhaldsskólana tvo og hjúkrunar- og dvalarheimilið Hlíð – og að sama skapi stutt í ýmsa verslun og þjónustu.