Hjúkrunarheimilið verður fyrir 80 íbúa

Hjúkrunarheimili sem byggt verður við Vestursíðu í Glerárhverfi og taka á í notkun árið 2026 verður fyrir 80 íbúa en ekki 60, eins og fyrri samningur við ríkið gerði ráð fyrir.

Bæjarráð samþykkti viðaukasamning þar að lútandi í febrúar og Ásthildur Sturludóttir bæjarstjóri hefur nú undirritað hann ásamt  Willum Þór Þórssyni heilbrigðisráðherra.

Hjúkrunarheimilið mun rísa við Vestursíðu 13 í Glerárhverfi, norðan hjúkrunarheimilisins Lögmannshlíðar. Áætlaður heildarkostnaður nemur tæpum 4,3 milljörðum króna sem skiptist þannig að 85% greiðast úr ríkissjóði en 15% greiðir Akureyrarbær. Standist áætlun um kostnað verður hlutur sveitarfélagsins 645 milljónir króna.

Hjúkrunarheimilinu verður skipt niður í nokkrar litlar heimiliseiningar með um 8 til 11 einkarýmum ásamt sameiginlegum rýmum fyrir íbúa og starfsfólk, í samræmi við viðmið ráðuneytisins um skipulag hjúkrunarheimila frá síðasta ári.

Leikskóli á milli hjúkrunarheimilanna

Leikskóli verður einnig byggður á svæðinu. Á fundi bæjarstjórnar í desember á síðasta ári var samþykkt að hann yrði á milli hjúkrunarheimilanna. Á fundi skipulagsráðs höfðu áður legið fyrir tvær tillögur að útfærslu svæðisins, og varð tillaga B fyrir valinu þar og bæjarstjórn samþykkti þá niðurstöðu.

• Tillaga A ... fyrirhugað hjúkrunarheimili verði staðsett norðan við núverandi hjúkrunarheimili og sunnan við fyrirhugaðan leikskóla
• Tillaga B ... fyrirhugaður leikskóli verði staðsettur norðan við núverandi hjúkrunarheimili og sunnan við fyrirhugað hjúkrunarheimili.