Göngubrú yfir Glerá í burðarliðnum

Göngubrú yfir Glerá við Glerártorg og jöfnunarstöð Strætisvagna Akureyrar á bakka Glerár munu væntanlega rísa innan eins til tveggja ára. Minnisblað um framkvæmdaáætlun var lagt fyrir umhverfis- og mannvirkjaráð nýlega og skipulagsráð fjallaði fyrir skemmstu um breytingu á deiliskipulagi vegna tilfærslu á brúnni miðað við staðsetningu í núverandi skipulagi.

Skipulagsráð leggur til við bæjarstjórn að samþykkja breytingu á deiliskipulagi sem felst í að fyrirhuguð göngubrú yfir Glerá, vestan Hörgárbrautar, hliðrist um 50 metra til austurs ásamt aðlögun aðliggjandi stíga. Gera má ráð fyrir að þessi tilfærsla tengist áformum um færslu jöfnunarstöðvar Strætisvagna Akureyrar úr miðbænum á bakka Glerár við verslunarmiðstöðina Glerártorg. 

Þess má geta að á fundi umhverfis- og mannvirkjaráðs þann 23. janúar var lagt fram minnisblað varðandi framkvæmdaáætlun fyrir byggingu jöfnunarstöðvar strætó við Glerá og brúar yfir Glerá milli Glerártorgs og Skarðshlíðar. Akureyri.net greindi frá því í júlí þegar ráðið samþykkti að stefnt skuli að flutningi jöfnunarstöðvar SVA að Glerártorgi á næstu 1-2 árum.

• Jöfnunarstöð strætó við Glerártorg

Frumdrög sem EFLA vann að hönnun göngu- og hjólabrúar voru lögð fyrir umhverfis- og mannvirkjaráð í desember 2022 og samþykkti ráðið þá að þróa áfram valkost A og B2, sem sjá má á myndunum hér að neðan, ásamt því að skoða að setja gönguleið undir Hörgárbrú að norðanverðu.