Samið um land fyrir sleðabraut í Hlíðarfjalli

Akureyrarbær og Kambagil ehf. hafa undirritað samning um afnot af landi til reksturs sleðabrautar milli Hlíðarfjalls og Hálanda. Þetta kemur fram í frétt á vef Akureyrarbæjar.

Brautin verður allt að 1.800 metra löng en verkefnið á rætur að rekja til hugmyndasamkeppni um nýja afþreyingu í Hlíðarfjalli. Hugmyndin er að brautin verði í rekstri allt árið og er því góð viðbót við fyrirætlanir um að efla Hlíðarfjall sem heilsársafþreyingu. Stefnt er að því að framkvæmdir hefjist árið 2026 og að brautin verði opnuð sumarið 2027, en í síðasta lagi sumarið 2028.

• Umfjöllun akureyri.net frá 2023: Viðræður um sleðabraut í Hlíðarfjalli 

Leigutími samningsins er 25 ár frá opnun, með möguleika á endurskoðun og framlengingu síðar. Rekstraraðili mun einnig hafa heimild til að samnýta bílastæði Hlíðarfjalls.

Verkefnið er háð því að fjármögnun fáist og að öll tilskilin leyfi verði veitt, að því er segir á vef Akureyrarbæjar.