Færðu SAk þráðlausan hjartsláttarmónitor

Fæðingardeild Sjúkrahússins á Akureyri (SAk) fékk á dögunum þráðlausan hjartsláttarmónitor að gjöf. Það voru nokkrir Kiwanisklúbbar sem tóku höndum saman og gáfu tækið, klúbbarnir Herðubreið í Mývatnssveit, Kaldbakur á Akureyri, Skjöldur á Siglufirði, Drangey á Sauðárkróki, Askja á Vopnafirði, Skjálfandi á Húsavík og Grímur í Grímsey.

„Þráðlaus hjartsláttarmonitor gefur verðandi mæðrum meiri möguleika á að hreyfa sig um í fæðingunni því það eru engar snúrur sem hindra hreyfingu þeirra,“ segir Ingibjörg H. Jónsdóttir yfirljósmóðir, á vef stofnunarinnar. „Það er auðveldara fyrir þær að breyta um stellingu, en það getur haft jákvæð áhrif á gang fæðingarinnar. Einnig eru þráðlausu nemarnir vatnsheldir og því er hægt að fylgjast náið með hjartslætti barnsins þegar og ef konan óskar eftir því að vera í baði,“ segir Ingibjörg, hverrar formlegur nútímatitill er deildarstjóri fæðingardeildar.

„Saman mynda þessir Kiwanisklúbbar Óðinssvæði, sem flest ár gefa eitthvað sameiginlegt til styrktar börnum á svæðinu. Sjúkrahúsið vill þakka klúbbunum innilega fyrir þeirra fallegu gjöf sem kemur til með að nýtast ákaflega vel,“ segir á vef SAk.