Fækkun ferða stendur – bæjarráð mótmælir

Bæjarráð Akureyrarbæjar mótmælir harðlega þeirri niðurstöðu Vegagerðarinnar að niðurfelling fimmtudagssiglinga til Grímseyjar á tímabilinu 15. janúar til 14. maí muni standa. Þá vekur vísun Vegagerðarinnar í skerðingar á fjárframlögum til almenningssamngangna á komandi árum furðu bæjarráðs.

Hverfisráð Grímseyjar og bæjarráð Akureyrarbæjar höfðu mótmælt ákvörðun Vegagerðarinnar um niðurfellingu fimmtudagsferða á áðurnefndu tímabili, eins og akureyri.net greindi frá í frétt 26. apríl, og óskaði Ásthildur Sturludóttir, fyrrverandi bæjarstjóri, eftir upplýsingum um ástæður þessarar niðurfellingar og að ákvörðunin yrði endurskoðuð. 

Í svari Vegagerðarinnar segir að samkvæmt greiningum sem gerðar hafi verið sé fimmtudagsferðin minnst notuð á áðurnefndu tímabili. Farmflutningar séu til dæmis innan við fjórðungur af farmflutningi miðvikudagsferða. 

Horfa þurfi heildstætt á málið

Í bókun bæjarráðs frá því í gær segir meðal annars: „Bæjarráð mótmælir harðlega þeirri niðurstöðu að ekki sé unnt að verða við beiðninni að svo stöddu. Við mat á samgönguþörf Grímseyjar þarf að horfa heildstætt til íbúa, atvinnulífs, þjónustuþarfa og vaxandi fjölda ferðamanna yfir vetrartímann, en ekki eingöngu til gagna um flutning afla og fjölda þeirra sem hafa vetrarsetu í eyjunni.“

Fullyrðingar um fiskflutning stangast á

Varðandi flutning á afla virðist fullyrðing Vegagerðarinnar stangast á við fullyrðingu í bókun hverfisráðs Grímseyjar frá því í apríl þegar niðurfellingunni var mótmælt. Í erindi hverfisráðsins er bent á að fimmtudagsferðirnar séu lykilþáttur í að tryggja ferskleika sjávarafurða úr eyjunni á markað. Í minnisblaði Vegagerðarinnar dagsettu 13. maí, sem fjallað var um í bæjarráði í gær, segir orðrétt: „Samkvæmt þeim upplýsingum sem Vegagerðin hefur aflað sér, er ekki talið nauðsynlegt að afli fari í land á fimmtudögum.“

Vekur furðu að vísa í skerðingar á fjárframlögum

Í minnisblaði Vegagerðarinnar er að lokum farið yfir fjárveitingar til almenningssamgangna og vekur það furðu bæjarráðs að þar sé vísað til skerðingar á fjárframlögum til almenningssamgangna á komandi árum. „Slík framsetning kallar á skýr svör um hvað það þýðir fyrir brothættar byggðir sem reiða sig á öruggar og reglubundnar samgöngur fyrir grunnþjónustu og atvinnulíf,“ segir meðal annars í bókun bæjarráðs, sem hefur falið bæjarstjóra að kalla eftir nánari upplýsingum um þetta atriði. 

Hér er vísað til eftirfarandi orða í minnisblaði Vegagerðarinnar: „Fyrir liggur að málaflokkur almenningssamgangna er undirfjármagnaður á fjárlögum/fjármálaáætlun og er gert ráð fyrir frekri [sic] skerðingu á fjárframlögum til almenningssamgangna á komandi árum. Í ljósi þessa sér Vegagerðin sér ekki fært að bregðast við beiðni Akureyrarbæjar um að fjölga ferðum aftur að svo stöddu.“