Kjörkassi úr Grímsey „vistaður“ í fangaklefa

Siglt var með kjörgögn úr Grímsey til Dalvíkur í dag og þau átti að „vista“ í fangaklefa á lögreglustöðinni á Dalvík þar til menn á vegum kjörstjórnar á Akureyri voru væntanlegir um sexleytið til að sækja gögnin.

Það var Bjarni Reykjalín Magnússon, útgerðarmaður og skipstjóri í Grímsey, sem sigldi með kjörgögnin úr eyjunni á Ásdísi ÓF 9 og tók siglingin um tvær klukkustundir. Þegar Bjarni sigldi inn í höfnina á Dalvík biðu lögregluþjónar á bryggjunni og tóku við hinum dýrmæta farmi.

Fulltrúar kjörstjórnar verða svo á bryggjunni á Árskógssandi þegar Hríseyjarferjan Sævar leggst þar að laust fyrir klukkan hálf átta. Þaðan liggur leiðin, með kjörgögn úr akureyrsku eyjunum tveimur, í Verkmenntaskólann á Akureyri þar sem kjörstjórn er með aðsetur og atkvæði verða talin.