Pistlar

Verk gömlu meistaranna

Jóhann Árelíuz skrifar 12. apríl 2026 | kl. 06:00

EYRARPÚKINN - 85

Þeir voru fleiri sem léku á orgel í Vopnafirði en bræðurnir í Selárdal.

Á lognkyrrum síðkvöldum og sunnudagseftirmiðdögum mátti heyra séra Jakob fara fingrum nóturnar hvítu og svörtu og lék prestur verk gömlu meistaranna, tónskáld eins og Bach og Beethoven.

Séra Jakob þótti tóna allra presta best á sinni tíð og hljómaði vel í hinni nýbyggðu Hofskirkju og hann kom einnig fram í Ríkisútvarpinu og söng einsöng.

Frú Guðbjörg hafði tögl og hagldir í kvenfélaginu og hélt snjallar ræður á mannamótum.

Ekki þótti vinnupiltum verra að hlýða á prest sinn og verkstjóra undir vegg á sunnudegi og svifu bringukollar og sviðakjammar fyrir sjónum pilta sem þeim rann í brjóst í blíðunni.

Jóhann Árelíuz er rithöfundur og skáld.

Á sunnudögum um langa hríð birti akureyri.net kafla úr Eyrarpúkanum, gáskafullu skáldverki Jóhanns Árelíuzar sem gerist á Eyrinni á Akureyri um miðja síðustu öld. Bókin kom út 2003. Verk gömlu meistaranna er kafli úr bókinni Sveskjur í sólarlaginu, síðari bók Jóhanns um Eyrarpúkann en þar segir einkum frá dvöl drengsins á æskuslóðum föður hans í Vopnafirði. Bókin kom út 2010.

Til baka í yfirlit pistla