Sókndjarfur Dani til liðs við Þórsara

Knattspyrnudeild Þórs hefur samið við danskan knattspyrnumann, Christian Jakobsen, til tveggja og hálfs árs; út árið 2027. Jakobsen er 32 ára og leikur annað hvort á miðjunni eða sem framherji. Hann hefur leikið með liði Hvidovre í Kaupmannahöfn síðustu þrjú ár.

Jakobsen – alltaf kallaður „Greko“ – á að baki 196 leiki í dönsku úrvalsdeildinni og skoraði í þeim 36 mörk. Þá hefur hann spilað yfir 100 leiki í næst efstu deild í Danmörku. Hann er sagður fjölhæfur leikmaður sem getur leikið allar stöður framarlega á vellinum.

Daninn er mættur til Akureyrar en verður ekki löglegur með Þór fyrr en gluggi til félagaskipta verður opnaður á ný hérlendis eftir viku, fimmtudaginn 17. júlí. Þór tekur á móti Leikni í Boganum á laugardaginn en fyrsti leikur Jakobsen með Þór verður væntanlega gegn HK í Kórnum í Kópavogi daginn eftir að glugginn verður opnaður, föstudaginn 18. júlí.

Greko hóf ferilinn hjá Hvidovre, þar sem hann lék frá 2012 til 2015. Síðan lék hann með Roskilde, Brøndby, SønderjyskE og Lyngby áður en hann samdi við uppeldisfélagið á ný 2022.

Þórsarar eru í sjötta sæti Lengjudeildarinnar, næst efstu deildar Íslandsmótsins, með 17 stig að loknum 11 leikjum. Deildin er hálfnuð; efsta liðið að loknum 22 leikjum vinnur sér þátttökurétt í Bestu deildinni næsta sumar en næstu fjögur fara í umspil um annað laust sæti í efstu deild Íslandsmótsins að ári.

• Til gamans má geta þess að Greko og Marcel Rømer, sem gekk til liðs við KA fyrr í sumar, hafa tvisvar verið samherjar í heimalandinu. Fyrst hjá SønderjyskE frá 2017 til 2019 og síðan með Lyngby frá 2020 til 2022.