Siggi póstur

EYRARPÚKINN - 46

Það má stóla á Sigga póst með kaskeitið í látúnshnappajakkanum þegar hann leiðir hjólhestinn í hlað með bréf að austan í svörtu leðurtöskunni og þiggur glas af vatni hjá mömmu.

Brosmildur maður Sigurður og tjúllast ekki þó púki leiði hjól hans afsíðis enda hlýr eins og sólin og lumar á blönduðum brjóstsykri.

Má stóla á Sigga póst eins og gulu vatnspóstana með rauða hattinn sem varða veg lítils snáða sem hleypur út og suður Eyrina eins hratt og fætur toga.

Jóhann Árelíuz er rithöfundur og skáld.

• Siggi póstur er kafli úr Eyrarpúkanum, gáskafullu skáldverki sem gerist á Eyrinni á Akureyri um miðja síðustu öld. Bókin kom út 2003.