Legið í gottinu

EYRARPÚKINN - 54

Mig dreymir um bláar og brúnar Akrakarmellur, núggat- og rjómatoffí, tuttuguogfimmaurakúlur, súkkulaðivindla og rauðar möndlur og fúlsa ekki við Heklustaur og sterku brenni.

Flestu má sporðrenna með gosi og passar ískalt og freyðandi Cream Soda sérlega vel með Mónubuffi sem er loftkenndara en Lindubuffið og ekki eins slæmt fyrir tennurnar.

Leita ég uppi svarta buddu mömmu hvurnin sem hún felur hana og vitja reglulega og fer vart í búð með móður minni að ég komi tómhentur heim.

Stend frekar á öskrinu og grenja svo til vandræða horfir rjóður út að eyrum.

Horfir búðarfólk og kellingar vorkunnaraugum á mömmu blessunina og hugsar Aumingja konan, hvurnin skyldi þetta enda?

Jóhann Árelíuz er rithöfundur og skáld.

• Legið í gottinu er kafli úr Eyrarpúkanum, gáskafullu skáldverki sem gerist á Eyrinni á Akureyri um miðja síðustu öld. Bókin kom út 2003.