Jói Víglunds

EYRARPÚKINN - 31

Kannski var mér ætlað að feta í fótspor nafna míns Jóhanns Víglundssonar úr Innbænum?

Las ég um Jóa í Tímanum en þar var mynd af honum á stærð við eldspýtustokk á forsíðunni.

Hafði Jói rofið þakið á Hegningarhúsinu við Skólavörðustíg við annan mann og fór um landið á stolnum jeppa og rændi brennivíni, bensíni og sígarettum.

Hann var stórhættulegur.

Voru strokufangarnir hirtir eftir tvo sólarhringa.

Jói Víglunds var frægasti glæpon á Íslandi og lék ljómi um hann í hugum okkar strákanna.

Jói óð í kvenfólki, Jói var ranglæti beittur, Jói var Hrói höttur.

Bárum við nokkra virðingu fyrir strákunum í Innbænum fyrir vikið því þeir voru kræfir og kölluðu ekki allt ömmu sína.

Jóhann Árelíuz er rithöfundur og skáld.

• Jói Víglunds er kafli úr Eyrarpúkanum, gáskafullu skáldverki sem gerist á Eyrinni á Akureyri um miðja síðustu öld. Bókin kom út 2003.