Pistlar nemenda við HA: „Rússland yfirgaf mig“

„Ég yfirgaf ekki Rússland, Rússland yfirgaf mig,“ sagði rússneski blaðamaðurinn Kirill Martynov, sem býr í Ríga í Lettlandi, fyrir nokkrum vikum í viðtali við Svein Brimar Jónsson, nemanda í fjölmiðlafræði við Háskólann á Akureyri. Nokkrir nemendur fóru í námsferð til Ríga í vor þar sem þeir ræddu meðal annars við rússneska blaðamenn sem flúið hafa heimalandið til þess að geta sinnt starfinu.

Akureyri.net birtir í dag pistla eftir tvo nemandanna sem fóru til Ríga.

„Hann segist vera enn sama manneskjan sem hann var fyrir 10 árum þegar hann var háskólakennari í Moskvu en landið er ekki það sama í dag,“ segir Sveinn Brimar um Martynov. „Áður en hann gerðist blaðamaður var hann kennari, hann hafði áhuga á stjórnmálum. Kirill vildi halda í hugmyndina um frelsi fyrir Rússa og til þess er mikilvægt að vera með fagmannlega blaðamennsku. Hann flutti því til Lettlands og hélt uppi fréttamiðli um Rússland.“

Innrásin í Úkraínu áfall

Annar nemandi HA, Halldóra Margrét Pálsdóttir, ræddi við Līva Skapste, 20 ára nemanda við Stradina háskólann í Ríga. Hún hefur stundað nám í margmiðlun á meðan stríð hefur geisað í nágrannalandinu og hún segir fólk ávallt vera viðbúið hverju sem er. 

„Það var áfall að heyra greint frá því þegar innrásin í Úkraínu átti sér stað,“ sagði Skapste við Halldóru Margréti. „Ég hef heyrt foreldra mína tala um það hvernig lífið var þegar þau voru yngri, en núna þegar þetta er að gerast á okkar tíma er það mjög kvíðavaldandi. Stríðið er mjög nálægt okkur og ástandið varð enn raunverulegra fyrir mig þegar kærastinn minn fékk að vita að hann ætti að fara í herinn í júlí.“

• Pistill Sveins Brimars:  „Ég yfirgaf ekki Rússland, Rússland yfirgaf mig“
• Pistill Halldóru Margrétar: „Við erum einu skrefi frá því að sagan endurtaki sig“