Vinabæjarsamstarfi við Múrmansk slitið?

Bæjarráð Akureyrar vill slíta vinabæjarsamtarfi við Múrmansk í Rússlandi og jafnframt að Akureyrarbær segir sig úr samtökunum Northern Forum. Þetta var samþykkt á fundi ráðsins í morgun og tillögunni vísað til umræðu í bæjarstjórn.

Svohljóðandi bókun var samþykkt á fundinum:

„Bæjarráð fordæmir innrás rússneskra stjórnvalda í Úkraínu og leggur til við bæjarstjórn að Akureyrarbær slíti vinabæjarsamstarfi við Múrmansk og jafnframt að Akureyrarbær segi sig úr samtökunum Northern Forum, sem er að stórum hluta samtök sveitarfélaga í Rússlandi.“

Fund bæjarráðs í morgun sátu Halla Björk Reynisdóttir formaður, Heimir Örn Árnason, Inga Dís Sigurðardóttir, Hilda Jana Gísladóttir, Sunna Hlín Jóhannesdóttir og áheyrnarfulltrúarnir Brynjólfur Ingvarsson og Jana Salóme I. Jósepsdóttir.

Múrmansk er hafnarborg á Kólaskaga í norðvesturhluta Rússlands, nálægt norsku og finnsku landamærunum. Skrifað var undir vinabæjasamkomulag við borgina árið 1994 í heimsókn bæjarstjórans á Akureyri þangað, að því er segir á vef Akureyrarbæjar. „Samskiptin voru lítil í fyrstu en hafa aukist á síðustu árum,“ segir þar.