Gleymum við stundum litlu fyrirtækjunum?

Akureyri er öflugur þjónustukjarni fyrir allt Norðurland. Í bænum starfa fjölmörg lítil og meðalstór fyrirtæki, meðal annars á sviði þjónustu og verslunar, og brýnt er að styðja við rekstrarumhverfi þeirra, enda fá þau ekki alltaf sanngjarnt vægi í umræðu um atvinnumál.

Hér eru nokkur atriði sem ég tel nauðsynlegt að Akureyrarbær tryggi þeim til handa:

• Atvinnulóðir og húsnæði: Tryggjum á hverjum tíma fjölbreytt framboð atvinnulóða og gera ráð fyrir húsnæði fyrir lítil og meðalstór fyrirtæki í allri uppbyggingu, á þéttingareitum, í nýjum hverfum og á atvinnusvæðum.
• Stöðugleiki í efnahagsmálum: Tökum virkan þátt í sameiginlegri vegferð hins opinbera til að vinna gegn verðbólgu og háum vöxtum.
• Orkuöryggi og flutningskerfi: Styrkjum flutningskerfið með Blöndulínu 3 til að draga úr flökti sem getur bitnað sérstaklega á minni fyrirtækjum sem eru síður varin fyrir áhættu.
• Ferðamennska og aðdráttarafl bæjarins: Byggjum upp Akureyri sem eftirsóknarverðan áfangastað og tengjum það sérstaklega við lýðheilsutengda ferðamennsku, menningu og tækifæri sem felast í millilandaflugi og komu skemmtiferðaskipa.
• Sterkari miðbær: Eflum miðbæinn enn frekar með uppgerð gatna og opinna svæða og gerum hann aðlaðandi fyrir íbúa, gesti og atvinnustarfsemi.
• Aðgengi og bílastæði: Fækkum ekki frekar bílastæðum í kringum atvinnustarfsemi. Ráðumst meðal annars í heildarúttekt á bílastæðamálum í miðbænum með það að markmiði að bæta aðgengi og styðja við verslun og þjónustu.
• Geymslurými fyrir fyrirtæki: Setjum á fót öruggt geymslusvæði þar sem fyrirtæki geta leigt rými fyrir tæki og tól.
• Innviðir og hagsmunagæsla: Stundum virka hagsmunagæslu um innviðauppbyggingu á Akureyri og í nágrenni til að styrkja fjölbreytt atvinnulíf og samkeppnishæfni fyrirtækja.
• Fasteignaskattar og sanngirni: Skatttekjur sveitarfélaga hafa aukist verulega á síðustu árum í gegnum útsvar, að stórum hluta vegna mikilla launahækkana, og því ekki nema sanngjarnt að fyrirtæki njóti þess á móti með lækkun fasteignaskatta.
• Húsnæðismál starfsfólk: Tryggjum nægt framboð íbúðarhúsnæðis og verum jákvæð fyrir uppbyggingu á viðunandi húsnæði fyrir starfsfólk, þar með talið lausnir til skemmri tíma.

Sunna Hlín Jóhannesdóttir er oddviti Framsóknar á Akureyri