Vilja aftur meiri- og minnihluta í bæjarstjórn

Meiri- og minnihluti verða aftur teknir upp í bæjarstjórn Akureyrar ef marka má áherslur oddvita framboðanna í bæjarstjórnarkosningunum í umræðuþætti á RÚV. Þar lýstu fæstir oddvitanna sig fylgjandi því að öll bæjarstjórn ynni áfram sem ein heild að verkefnum.

„Í kjölfar síðustu sveitarstjórnarkosninga mynduðu L-listi Bæjarlistans, S-listi Samfylkingar og B-listi Framsóknarflokks, meirihluta í bæjarstjórn. Í nóvember 2020 var hinsvegar ákveðið að afnema minni- og meirihluta í bæjarstjórn. Bæjarstjórn hefur síðan þá unnið í sameiningu að rekstri sveitarfélagsins. Akureyrarbær er fjölmennasta sveitarfélagið utan höfuðborgarsvæðisins með hátt í 20 þúsund íbúa,“ segir á vef RÚV.

Oddvitar framboðanna á Akureyri lýstu flestir þeirri skoðun að ekki væri árangursríkt að starfa áfram með óbreyttum hætti í bæjarstjórn.

Smellið hér til þess að horfa á framboðsfundinn á RÚV.