Umræðan

Halla Björk hættir í bæjarstjórn í vor

Valur Sæmundsson skrifar 18. nóvember 2025 | kl. 14:30

Halla Björk Reynisdóttir, bæjarfulltrúi L-listans, Bæjarlista Akureyrar, ætlar ekki að gefa kost á sér til áframhaldandi setu í bæjarstjórn þegar yfirstandandi kjörtímabili lýkur í vor. Þetta segir hún í svari við fyrirspurn akureyri.net.

Halla Björk, sem er forseti bæjarstjórnar, settist fyrst í bæjarstjórn árið 2010 þegar L-listinn vann stórsigur í kosningunum og hlaut 6 af 11 bæjarfulltrúum. Hún var ekki í framboði við næstu kosningar 2014 en skipaði efsta sæti listans fyrir kosningarnar 2018. Hún skipaði síðan 3. sæti L-listans fyrir sveitarstjórnarkosningarnar 2022 en eftir að tveir fulltrúar listans hættu í bæjarstjórn á kjörtímabilinu varð hún oddviti hans.

Svar Höllu Bjarkar í heild:

Ég mun ekki gefa kost á mér til þess að leiða L-listann í sveitarstjórnarkosningum 2026. Ég hef setið sem bæjarfulltrúi fyrir L-listann nú í tæp tólf ár. Þetta hefur verið skemmtilegur tími, þar sem ég hef fengið að koma að mörgum mikilvægum verkefnum, en nú hlakka ég til þess að eiga meiri frítíma með mínum nánustu.

Kosið verður til sveitarstjórna 16. maí í vor.

Til baka í umræðuna