Úrslit ráðast í ýmsum greinum í vikunni

Nokkrum bikurum verður lyft á næstu dögum, en spurning hve mörg Akureyrarlið munu fá að njóta sigurgleðinnar. Úrslitin munu ráðast í einvígi SA og Fjölnis í íshokkí kvenna, annaðhvort á þriðjudag eða fimmtudag. Þá á kvennalið Þórs möguleika á að komast í úrslitaleik VÍS-bikarsins í körfunni og bæði blaklið KA eru í góðri stöðu til að vinna deildarmeistaratitlana í blaki á laugardag.

MÁNUDAGUR - körfubolti

Lokaumferðin í 1. deild karla í körfuknattleik verður leikin í kvöld. Þórsarar sækja næstefsta lið deildarinnar, Ármann, heim. Nú þegar er ljóst að Þór endar í 6. sæti deildarinnar og mætir Fjölni í fyrstu umferð umspils um sæti í Bónusdeildinni.

• 1. deild karla í körfuknattleik
  Laugardalshöll kl. 19:15
  Ármann - Þór
  

- - -

ÞRIÐJUDAGUR - íshokkí og körfubolti

SA og Fjölnir mætast í fjórða leiknum um Íslandsmeistaratitilinn í íshokkí kvenna. SA verður að vinna leikinn til að tryggja sér oddaleik í einvíginu. 

• Úrslitaeinvígi um Íslandsmeistaratitil í íshokkí kvenna
  Skautahöllin á Akureyri kl. 19:30
  SA - Fjölnir

- - -

Annað árið í röð er kvennalið Þórs í körfuknattleik komið í undanúrslit bikarkeppninnar og annað árið í röð eru Grindvíkingar andstæðingarnir í undanúrslitunum. Í fyrra vann Þór með fjögurra stiga mun, 79-75.

• VÍS-bikar kvenna í körfuknattleik, undanúrslit
  Smárinn í Kópavogi kl. 20
  Grindavík - Þór

- - -

MIÐVIKUDAGUR - handbolti

Karlalið KA í handknattleik er í þeirri stöðu þegar tveimur umferðum er ólokið að geta komist í úrslitakeppnina, en hefur þó ekki endanlega forðast fall. HK er í 8. sætinu með 16 stig, þá kemur KA með 13 og síðan ÍR með 11 stig, Grótta tíu og Fjölnir átta.

• Olísdeild karla í handknattleik
  KA-heimilið kl. 19:30
  KA - FH

- - -

FIMMTUDAGUR - íshokkí?

Til þess að kvennalið SA eigi möguleika á Íslandsmeistaratitlinum verður liðið að vinna Fjölni í fjórða leik einvígisins á þriðjudag. Fari svo verður oddaleikur í Egilshöllinni á fimmtudag.

- - -

FÖSTUDAGUR - fótbolti?

Undanúrslit í Lengjubikar kvenna í knattspyrnu eru á dagskrá á föstudag, en leikur Þórs/KA og FH hefur ekki verið staðfestur í mótakerfi KSÍ. Hinn undanúrslitaleikurinn er á milli Breiðabliks og Vals og fer hann fram á föstudag. 

- - -

LAUGARDAGUR - blak og kannski körfubolti

Það ræðst á laugardag hvort blakliðum KA tekst að vinna deildarmeistaratitlana, en bæði liðin eru í góðri stöðu. Karlaliðið með tveggja stiga forystu á Þrótt og kvennaliðið með eins stig forystu á Völsung. 

• Unbroken-deild karla í blaki
  KA-heimilið kl. 17
  KA - Vestri
  
• Unbroken-deild kvenna í blaki
  KA-heimilið kl. 19:30
  KA - Þróttur R.

- - -

SUNNUDAGUR - handbolti

KA/Þór kveður Grill 66 deildina í lokaumferðinni á sunnudag, en nokkuð er síðan liðið tryggði sér sigur í deildinni og sæti í Olísdeildinni á næsta tímabili.

• Grill 66 deild kvenna í handknattleik
  KA-heimilið kl. 14
  KA/Þór - Fram 2